Maymay sa Magbalantay

“Kining mga problema kabahin naman ni sa atong kinabuhi. Hinaot anad namo diha. Pero bisan pa man, mabug-atan gihapon ta kon naa tay mga suliran nga atubangon. Ato lang nang dawaton. Pero hinaot magpabilin mong malinawon.

Unsa man gyoy nakapaluya nato karon? Unsa may atong gipas-an? Unsay nakapabug-at sa atong kinabuhi?

Lain-lain man gyod ta’g rason.

Kon ang imong gibuhat, nakakapoy nimo, para sa Ginoo, makahuluganon kini ug mahimong gaan. Ang problema kon ang nakakapoy nato kanang butang nga kalibutanon.

Tan-awa na unsay hinungdan sa inyong kakapoy.

Kon nabug-atan mo tungod sa concerns ninyo nga naay kalambigitan sa kasingkasing, sa inyong gugma para sa pamilya o sa isigkatawo o sa nasud, okay kaayo. Sagdi lang. Mao nay nindot nga kakapoy.

Pero kon maproblema nata sa atong mga kalibutanon nga gipangbuhat, di kaayo maayo.

Pananglitan, naay uban kapuyon kay sige’g laag, sige’g pangitag kwarta bisag naa nay ilaha, dunay bisyo, sigeg inom, nabuntagan sa sugal, nagsige lang og uban sa barkada, kana nga klase nga kakapoy dili kaayo makahuluganon.

Kon gikapoy mo, gibug-atan mo, tungod sa maayo nga rason, tungod sa inyong gugma sa Diyos ug isigkatawo, nindot kaayo. Naay kahulugan ang kakapoy o kabug-at.

Giingon ni Kristo, umari kamo kanako kay papahulayon ko kamo. Kon gusto tang mopahulay, kon gikapoy ta, si Kristo mihatag nato og pagdapit, “umari kamo kanako.” It’s a good invitation nga I hope dili nato balibaran.

Naa gyod tay panahon nga moduol niya. Moadto ta sa simbahan, moatubang sa Blessed Sacrament. Mogahin og panahon atubang niya sa pag-ampo. Bisag hilom lang gud, bisag molingkod lang ta atubangan sa Santisimo. Moadto ba mo sa inyong kapilya, lingkod lang, ibutang lang imong kaugalingon atubangan sa Diyos.

Bisan wa tay gisulti, bisan wa tay gibungat, moduol lang ta sa Ginoo, because kahibalo ta nga daghan ang mahitabo diha sa kahilom.

Kon motingog ta, kon naa tay gusto nga isulti niya, atong ipahungaw niya diha sa kahiladman kanato. Ipahungaw nato niya atong mga suliran nga giatubang. Nindot kaayo inig ka human. Naa gyod tay mabati nga lahi nga matang sa pahulay.”