Maymay sa Magbalantay

“Kon maghikay ta, ang una gyod natong dapiton kato man gyod mga suod nato. Unsa man diay dautan ani?

Mga igsuon, sa pagkatinuod lang, wala may dautan. Gani, si Kristo, I’m sure sa iyang panahon makigsalo man siya uban sa iyang mga suod ug mga kapamilya.

Pero mga igsuon, naa siyay buot ipasapot nga pagtulun-an. Unsa man kini? Ang tinuod gyod nga mahigugma dili gyod maghulat balosan. Ang tawo nga tinuod nahigugma dili mag-apas nga siya pagabalosan sa iyang gugma ug kaayo. Ang tinuod nga gugma unconditional o pure.

Kahibalo ang Ginoo kahibalo sa tawhanon nato nga sentimento. Unya mao pod ni atong kahuyang nga tawhanon. Ganahan ta motabang sa tawo nga gatuo ta mobalos pod nato og tabang. Ganahan ta nga mohatag ngadto sa mga tawo nga kahibalo ta naa pod ikahatag balik nato. Ang tawhanon nga kinaiya ganahan ra gyod ta magpakita og kaayo ngadto sa mga tawo nga magpakita pod og kaayo nato.

Mao ni ang gusto ipausab sa Ginoo nato. Ang gusto sa Ginoo nga ang atong dapiton o tagaan og pagtagad, katong mga tawo nga way ikabalos nato para maila o masukod unsa katinud-anay ang atong kaayo o gugma para kanila.

Para sa Ginoo, ang gugma nga imong ihatag sa laing tawo unya di mabalosan maoy makapahimo nimo nga bulahan. Ngano man? Tungod kay ang Diyos na ang magbalos kanimo.

Sa atong pagbuhat og maayo, sa atong pagpakita og gugma, di nato kalimtan ang mga tawo nga labing nanginahanglan sa atong tabang. Kay gusto sa Ginoo way mapasagdan, way mabiyaan. Kon ato lang tawhanon nga kagustuhan atong ipatuman, dakong puruhan nga daghan sa atong mga kaigsuonan labi na ang mga kabus mabiyaan, mapasagdan.”