Mga Pagbasa

Unang Pagbasa: Dn 1:1-6. 8-20
Salmo: Dn 3:52. 53. 54. 55. 56 /
Ebanghelyo: Lk 21:1-4

Maymay sa Magbalantay

“Unsa man kadako ang sakripisyo nga atong giuban sa atong halad sa atong Ginoo?

Daghang higayon, daghan kanato, mohatag lang ta sa atong sobra. Dili man hatag nga makauban og dakong sakripisyo.

Kining biyuda sa ebanghelyo, nihatag sa gamay nalang gyod ang iyaha, mao ra gyod to iyang panginabuhian, pero iyang gihatag tungod sa iyang dakong gugma ug pagsalig sa Ginoo.

Over and above the amount, the Lord will look at the heart of the giver. Tan-awon niya ang kasingkasing nato, unsa atong tuyo sa paghatag? Kay daghan raba ang mohatag pod nga magpakitang-tao pa. Magpasikat.

Kon ang atong tuyo sa paghatag mao ang pagpasikat, dili maayo. Kay ang atong gitagaan nakakita sa atong kasingkasing. Magbantay ta sa atong pagdonar, unsa man gyod atong tuyo?

Hinaot nga ang atong paghatag tinukmod sa atong gugma sa Ginoo, ug sa atong kasayuran nga ang tanan iya sa Diyos. Kon naa tay madawat gikan niya nga grasya, dapat sad dako atong tinguha ug gugma nga mohatag og balik ngadto niya.

Nakita sa Ginoo atong kasingkasing. Mao nga hinaot nga atong tuyo sa paghatag aron gyod sa pagpasidungog kaniya. Dili aron nga kita pasidunggan.

Ang kwentahon dili ang gidak-on sa atong gihatag, kondili ang gidak-on sa nahabilin nga atong gihawiran. Ang biyuda gidayeg sa Ginoo kay gihatag man niya ang tanan ug wala nay nahabilin kaniya.

Matod sa usa ka spiritual writer, kining gibuhat sa biyuda is a prelude of what is going to happen in calvary. Ang gibuhat sa biyuda nga paghatag sa iyang kinatibuk-an usa ka hulagway sa umaabot nga mahitabo didto sa kalbaryo. Ang biyuda mihatag sa tanan nga iyang gikuptan, si Kristo usab didto sa kalbaryo mohatag sa tanan sa iyang kinabuhi.

Sa daghang higayon, mohatag ta dili kinasingkasing. Mohatag ta sa unsa ray extra. Di ta mohatag nga ubanan gyod og sakripisyo. Nindot ni nga hagit.

At the same time hagit ni sa mga tawo nga moingon nga “gamay ra man akong mahatag kay pobre ra man ko.” Ayaw kompyansai kana. Ang importante imong gihatag nga mahigugmaon. Kanang ginagmay nga imong natabang ug nahatag, sa mga mata sa Diyos aduna na siyay dako nga bili.

Bisan ginagmay, kana imong pahiyom, ginagmay, pero dako kaayo na siyay og ikatabang sa mga tawo labi na sa mga tawo nga nanginahanglan og pagdasig sa iyang kinabuhi.

Bisan unsa ta ka-simple ug ordinaryo sa katilingban, duna tay mahimong dako nga ikatabang sa laing tawo. Ug ang atong himuon makita gyod sa Ginoo. Dalaygon sa mga mata sa Diyos.

Every little act of kindness is a step closer to heaven.”