“Dili tanang fire makaguba, ug dili tanang pagbahin-bahin makadaot. Dili pod tanang matang sa kalinaw makaayo.

Pananglitan, nagmalinawon ta bisan tuod naa nay nagkagubot diri sa atong silingan. Dili mana maayo kay wa man ta molihok aron ang maong kagubot masulbad.

Pananglitan, naa tay silingan nga nasakit unya nagkalisod-lisod intawn. Unya kita, wa maunsa, wa ta madisturbo, natulog ra ta nga malinawn, wa ta matandog sa kahimtang sa atoang silingan. Mao ni matang sa kalinaw nga dili maayo.

Pananglitan, kahibalo gyod ta nga ang atong mga pangulo wala na magtarong, grabe na kaayo ang kaso sa graft and corruption, unya nagmalinawn ra gihapon ta, wa gyod ta magpakabana, di na maayo.

Di pod tanang matang sa pagkabahin-bahin dautan, unya dili sad tanang matang sa kahiusahan maayo.

Lisura sabton pero let me explain.

Pananglitan, nagkahiusa kining usa ka pundok nga magbuhat og dili maayo nga pamaagi. Nagkasinabot sila nga ang ilahang proyekto ilang i-substandard para naa silay masulod sa ilang bulsa. Kini nga klase sa kahiusahan di mani maayo.

Ang mga studyante pananglitan nagkahiusa sila nga ilang pareglahan tong tawo nga wa nila ganahi, di pod na maayo.

O kaha pundok sa mga kaparian nga magkahiusa nga mo-rebelde sa ilang obispo, it can happen, possible nga mahitabo, di maayo nga kahiusahan.

O kanang mga silingan nga magkahiusa sa pagpanglibak, pangdaot og laing tawo, di na maayo nga kahiusahan.

Kalinaw nga dili maayo, kahiusahan nga dili maayo, mao nay gusto nga usbon ni Kristo.

Daghan kaayo natong mga kaigsuonan nga way pagpakabana. Moingon lang nga ‘naandan naman na, mao naman gyod na, mausab pa ba gud na nato?’ Wa na. Mao nay katilingban nga napawong na. Kinahanglan na sigaon og balik, kon mahimo gani, padilaabon.

Gidasig ka ni Kristo karon nga molihok, magpakabana, aron nga ang dili maayo nga practice, mausab.”