Mga Pagbasa

Unang Pagbasa: 1 Mc 2:15-29
Salmo: Ps 50:1-2. 5-6. 14-15
Ebanghelyo: Lk 19:41-44

Maymay sa Magbalantay

“Ang atong gisunod, dili siya Ginoo nga way kasingkasing. Dili siya usa ka Diyos nga way pagbati. Dili siya usa ka Ginoo nga layo sa atong kinabuhi.

Ang atong Ginoo duna siyay kasingkasing — dili lang ordinaryo nga kasingkasing, pero balaan nga kasingkasing. Ang maong kasingkasing matandog gyod pag-ayo kay mohilak gud.

Ang tawo nga matandog, makahilak. Ang tawo nga dunay gugma, makahilak. Ang tawo nga maluoy, makahilak. Ug kini nahitabo tungod kay duna siyay kasingkasing. Ug tungod kay gihimo siya sumala sa dagway ug kasamahan sa Diyos.

Nganong mohilak, mobati, mahigugma, maluoy ta? Tungod kay sama kita sa Diyos nga maoy nagbuhat kanato.

Mga igsuon, kining paghilak ni Jesus usa ka hilak sa kaluoy. Dili ni hilak sa kasuko o magkondena. Hilak sa usa ka Diyos nga buot moluwas sa iyang katawhan.

Kon kita nga iyang katawhan mahisama sa katawhan sa Jerusalem, nga bisan kauban na nato ang Diyos, bisan gidawat na nato ang Diyos, bisan naminaw na kita niya diha sa Santos nga Misa ug sa mga sakramento nga atong nadawat, unya wa gihapon ta makaila o maka-recognize sa kaluwasan nga iyang gidala para kanato, that’s painful for God.

Ang atong kaluwasan iyang gihalaran sa iyang tibuok kinabuhi. Unya kon di nato dawaton, di nato ilhon, masakitan siya pag-ayo.

Tungod sa pagpakasala, ang katawhan sa Diyos mag-antos og maayo. Epekto sa kinabuhi nga layo sa Ginoo, kasakit ug kaparutan sa mga tawo. Nakita nani sa Ginoo, nga sa umaabot nga mga adlaw, kon di mausab ang katawhan sa Jerusalem, mahugno, bisan ilang templo, bisan ang balay sa Diyos, mawala nila. Nakahilak ang Ginoo.

Kanang mga kasakit nga atong masinati labi na karong panahona, ang uban tan-aw ani gaba na gyod na nato. Silot sa Ginoo. Mao nani balos sa Ginoo sa atong pagpakasala. Mao nay atong dali nga hunahunaon.

Pero sa pagkatinuod lang, kining nahitabo nato nga pag-antos ug kasakitan, epekto ni sa sala. Epekto sa buhat sa mga tawo nga nalayo sa Ginoo.

I hope makapabuka na sa atong mga mata. Kay mohunong nata og tan-aw anang hulagway sa Ginoo nga manimalos. Kay di na mao ang Ginoo nga gidala ni Kristo.

Ang Ginoo nga atong makita diha ni Kristo usa ka Diyos nga puno sa gugma, mobati pag-ayo nato, makahilak para kanato kay masakitan siya unsay mahitabo kanato.

Kining mga nahitabo sa atong kinabuhi karon nga pag-antos ug kasakitan sa mga tawo, dili ni panimalos sa Ginoo. Bunga kini o epekto sa atong pagpalayo kaniya. Bunga sa mga sala nga gihimo sa mga tawo nga mapahimuslanon. Makasubo lang kay ang nag-antos og grabe nga kasakit mao ang mga kabus, ug daghan niini mga inosente nga mga anak sa Diyos. That’s so painful, ug makahilak ang Ginoo.

Gani kita masakitan ta magtan-aw labi na moadto ta sa mga biktima o sa mga evacuation center. Sakit kaayo tan-awon. Maluya kita. Kon masakitan man gani ta, how much more ang Ginoo.

Angay natong sabton nga ang Diyos nga mohilak para kanato di gyod na siya motugot nga kita malayo kaniya. Dili siya motugot nga kita dili niya maluwas sa atong kahimtang. It’s really good to know that our God weeps for us kay pinaagi ana masabtan nato nga ang Ginoo sama sa usa ka magbalantay sa karnero, molihok gyod aron sa pagluwas sa iyang katawhan.

Sa atong bahin, manghinaot ko nga matag usa nato, di ta mawad-an anang matang sa kasingkasing nga gihimo sa Ginoo ug gibutang diha kanato.”