“Karong Domingo, Nobiyembre 9, atong gihangyo ang tanang parokya dinhi sa Cebu sulod sa Archdiocese nga maghimo og Second Collection para sa atong mga igsuon nga nabiktima sa nilabay nga bagyo ug baha.

Hinaot ko nga kini makadasig ninyo. Basin ang uban magbagulbol kay second collection na pod. Pero dili gyod angay nga magbagulbol, angay ta nga madasig kay kini buhat sa kaluoy para sa atong igsuon nga nabiktima intawn sa dakong bagyo ug baha.

Unya, kining apelar dili lang ni para sa taga Cebu kondili para pod ni sa mga igsuon natong Bol-anon. Sa atong mga kaigsuonan nga taga Bohol, both from the Diocese of Tagbilaran and Diocese of Talibon, kini si Bishop Abet naghangyo ninyo nga maghimo mo og second collection para sa atong igsuon diri sa Cebu nga nabiktima sa baha ug sa dakong bagyo.

Atong ipakita nga kita manag-igsuon. Mao ni kahigayonan o opportunity nga gihatag kanato nga ipabati nato atong gugma ug kaluoy para sa usa’g usa.

Puli-puli ra man ni atong kalisod, puli-puli pod atong kalipay. Pero atong ipakita nga kita tinuod nga synodal nga simbahan, usa ka lawas ni Kristo, kalipay sa usa, kalipay sa tanan, ang kaguol sa usa, kaguol sa tanan. Ang kasakit sa usa, kasakit sa tanan.”

— Cebu Archbishop Alberto “Abet” Uy
Maymay sa Magbalantay | 8 November 2025