Maymay sa Magbalantay

“Ang tinuod o maayo nga pag-ampo dili pataasay, kondili pagpaubos sa kaugalingon. Ato gyod sabton nga ang Diyos ra gyod ang tua sa taas, kitang tanan dapat mapaubsanon kay kitang tanan makasasala.

Usahay matintal ta moingon nga “Ginoo salamat dili ta pareha sa mga tawo diha sa DPWH, di ko kurakot, di ko sama anang mga pulitiko nga nangawat.”

Hinaot pa unta pero ambot lang kon sa atong kaugalingon di ba pod ta tikasan, wa ba poy mga panahon nga namintaha ta, o nakapanghilabot ta sa ubang tawo, o nakatabang ta sa ilang pagkaut-ot.

Dili ko makatubag ana para ninyo ug kamo pod di mo makatubag para nako. Ang Ginoo ra gyod ang nasayod sa tanan nga diha sa atong kasingkasing ug sa atong gipangbuhat sa hilom.

Mao na dili gyod angay nga condemning kaayo ta sa uban. Dapat mapaubsanon ta, atong ilhon nga kita pod duna tay kaugalingon nga kahuyang.

Ang Ginoo maminaw gyod sa pag-ampo sa mga mapaubsanon, dili sa mga mapahitas-on. Mao may angay nato sabton, dili lang sulod sa simbahan kondili bisan diha sa gawas sa simbahan, sa katilingban, sa atong kinabuhi. Sa mata sa Diyos, way makalupig sa tawo nga mapaubsanon.

Kanang self-righteous mao nay tawo nga gatuo nga siya ray santos. Gatuo nga ang ubang tawo dautan unya siya sakto kanunay. Di maminaw og tambag, grabe ang bilib sa kaugalingon.

Hinaot di ta masama ana bisan pa og obispo ka, pari ka, gobernador ka, o aktibo ka sa parokya, angay nga mapaubsanon, angay nga maminaw og tambag, angay nga masultihon. Kay dili man ta perpekto, usahay masipyat ta. But if we are humble, we learn, and then God is happy.

Ang pag-ampo sa mapaubsanon molapas sa panganod, mobiyahe gyod, hangtud nga motugpa sa kasingkasing sa Ginoo.

Holiness is not about comparing; it’s about caring. Ang tinuod nga pagkabalaan dili makita diha sa pagtandi sa atong kaugalingon sa uban, kondili diha sa atong pagpakabana sa uban hilabi na sa mga nanginahanglan.”