Maymay sa Magbalantay

“Una sa tanan, of course, it refers to all the saints canonized by the Church. Katong gideklara sa simbahan human napamatud-an ilang kabalaan, ideklara sila nga santos sa simbahan. Naay adlaw nga kita magpasidungog nila. Pananglitan, San Pedro, San Pablo, San Francisco de Asis, Sto. Tomas de Aquino, San Roque.

Pero kining adlaw sa mga santos, dili lang ni para ila, kondili para ni sa tanang binunyagan nga naningkamot pagpuyo sa kabubut-on sa Diyos samtang dinhi pa sila sa kalibutan.

Atong pasidungggan ang mga silent heroes sa simbahan. Mga santos sa hilom nga paagi tungod kay matag adlaw sa ilang kinabuhi maningkamot gyod sila sa pagtuman sa kabubut-on sa Ginoo diha sa lain-lain nila nga estado ug kahimtang.

Ma-imagine nato atong mga lolo ug lola nga mainampoon kaayo, naningkamot sa pagbuhi nato, pagpangga nato. Pwede to sila maapil sa listahan sa mga santos pero sa hilom nga paagi nga tua na sa langit.

Apil niini atong mga ginikanan nga naninguha sa pagbuhi kanato, nagpa-edukar nato, sa hilom ug limpyo nga paagi. Ila tang gipakaon pinaagi sa kwarta nga gipatuloan og singot, nga limpyo nga paagi.

Apil niini atong mga silingan, mga opisyales sa lungsod nga nagmatinud-anon sa pagpangalagad.

Apil niini atong mga kaparian, mga kamadrehan, nga kada adlaw nag-ampo para sa katawhan, ug sa ginagmay o dinagko nga paagi usab nagpadayag sa kabubut-on sa Ginoo sa ilang inadlaw-adlaw nga pagpangalagad sa mga tawo.

Apil niini atong mga taxi drivers, tricycle drivers, atong mag-uuma, mangingisda, nga kada adlaw maningkamot sad sila nga makatuman sa kabubut-on sa Ginoo diha sa ilahang ordinaryo nga kahimtang. Atong mga laborers, mga porters sa pier, mga driver sa bus, mga magtutudlo.

In other words, tanan tanan nga mga tawo nga sa kada adlaw maningkamot sa pagsunod sa kabubut-on sa Ginoo.

Tingali moingon mo, “Bishop, hibaw-an man to namo sila nga makasasala. Usahay gani mamalikas to. Usahay gani makainom to.”

Mga igsuon, bisag atong mga ginikanan noh makasasala sad sila. They are not perfect. Kinsa man goy perpekto sa kalibutan? Wala man. Bisag kani inyong obispo, makasasalang dako.

Dunay teologo nga nag-ingon, “Saints are sinners who never stop trying to do good and be good.”

Way usa nga perpekto. Daghang santos sa simbahan, makakasala pod to sila. Pero mga igsuon, they were sinners who never stop trying to do the will of God in their lives.

Meaning, makasasala sila, nagbasol, nangayo og pasaylo, ug naningkamot na pod nga magbag-o. Mao ni ang mga santos sa simbahan, apil niini atong mga ginikanan nga nagpangga nato. Tinuod, there were times nga nakasala sila, nasayop sila. Pero naningkamot sa pag-rosaryo, simba, ampo, ug nagtarong sa ilang kinabuhi.

Kining adlaw sa mga santos should remind us that. Kitang tanan gitawag nga mahimong balaan atubangan sa Diyos, mahimo sad nga mga santos. Matag binunyagan, gitawag nga mahimong balaan.”