Maymay sa Magbalantay

“Tingali daghan kanato adunay mga utang. Ingon si San Pablo ang usa ka utang ang dapat magpabilin. Maningkamot man ta sa pagbayad sa ubang matang sa utang, pero naay utang nga angay ipabilin nato, sa matag usa nato. Unsa man ni nga utang? Ang utang sa panaghigugmaay.

Kada adlaw, kinahanglan mobati ta nga utangan ta. Ngano man? Tungod kay ang maong utang, dili kabayran. Kitang tanan utangan sa Ginoo tungod kay Iya man tang gipakamatyan. Ang Iyang gugma para nato dako kaayo, ug kaning gugma Iyang gipadayag pinaagi sa paghalad sa Iyang kinatibuk-ang kinabuhi. Iya tang giluwas gikan sa sala ug kamatayon pinaagi sa pagpakamatay sa Krus. Ug kini ang atong utang Niya, utang nga bisan unsa pay atong buhaton di nato mabayran.

Ang atong paagi sa pagbayad, tungod sa Iyang dakong gugma nato nautang ta, ug ato Siyang mabayran dili sa kinatibuk-an, sa ginagmay lang nga paagi kada adlaw, pinaagi sa paghigugma sa atong isigkatawo.

Importante kaayo nga mobati kita nga naa tay utang kabubut-on sa Ginoo ug atong utang, atong bayran pinaagi sa paghigugma sa mga tawo nga gihigugma pud sa Ginoo. Bisan unsa pa kadagahan ang atong buhaton, dili pa gyod ni igo. Pero atong buhaton kay kinahanglan natong buhaton nga mapadayag nato sa Ginoo ang atong kagustuhan nga mobalos sad ta sa Iyang kaayo para kanato. Ang Ginoo dili manginahanglan sa atong balos pero malipay Siya nga ato siyang balusan pinaagi sa paghigugma sa mga tawo nga Iya pud nga gihigugma.

Pwede man ang tawo mahimong adunahan. Pwede niya makab-ot ang tanan, pwede maangkon ang tanan nga kabtangan pero kung wala siyay gugma, magpabilin ang maong tawo nga dili malipayon. Magpabilin siya nga walay kahulugan, tungod kay gugma ra gyod ang pinakabililhon sa tanan. Ang atong tanang butang nahawiran, ang atong tanang bahandi ug kwarta, kung walay gugma walay kapuslanan.

Ang sentro sa atong kinabuhi, gugma. Kay ang gugma iya sa Diyos. Pwede ta mahimong gamhanan, pwede ta makakupot og gahom. Mga igsoon, ang gahum nga walay gugma, kung ang gahum nga imong gihuptan dili nimo ubanan sa gugma, mahimo na siyang pag-abuso. Power without love easily becomes abuse.

Bisan ang kahibalo, ang pagkaantigo, ang pagkaalamon, kung walay gugma, mahimo na siyang arrogance. Intelligence without love, mahimo rang arrogance.

Bisan gani ang atong pagtoo sa Ginoo, ang atong pagka-Kristiyano, ang atong pagkahilimbahon, ang atong pagkamaampuon, kung dili ubanan sa gugma, mahimo ra siyang pakitang-tawo. Mahimo ra pud siyang basiyo, wala siyay pulos. Gugma gyod ang maghatag og kaluhugan sa tanan.

Kini nga mensahe ni San Pablo bilihon kaayo, ilabina panahon sa mga hadla sa kinabuhi, panahon sa kalisod, ang gugma gyod ang angay natong paharion. Labaw sa tanan, ang gugma gyod ang angay maghari ilabina karong panahona nga naa ta sa taliwala sa mga hagit sa kinabuhi, taliwala sa kalisod–linog, bagyo, baha–kining tanan malapsan nato, ma-overcome nato kon ang gugma ang maghari sa matag usa kanato.

Paningkamotan nato pagbuhat atong misyon. Ug mao ni hagit nako, dili lang sa akong kaugalingon kon dili para sa tanan nga nangulo sa pangagamhanan ug sa simbahan. Atong dawaton kining maong hagit. Atubangon nato, pero importante nga magpabilin nga malinawon ang kasingkasing. Naa man tay pagtoo sa Ginoo nga dili magpasagad nato.

Kining tanang panghitabo sa atong kinabuhi pagtugot sa Ginoo. Dili Niya kabubut-on nga ang mga tawo mag-antos, pero Iya ning gitugot kay naa Siyay katuyuan. Ang kinatibuk-ang kahulugan atong masabtan puhon. Hinay-hinay na moabot sa atong kasingkasing ug alimptakan. Ato ning atubangon uban ang pagsalig nga ang tanan naa sa kamot sa Ginoo. Hawid ta niya ug di gyod ta Niya pasagdan. Mao ni ang angay natong huptan, ang hugot nga pagtoo, diha sa atong kasingkasing.

This catastrophe, this calamity is an opportunity for us to prove our deep faith in the God who loves us.”