Mga Pagbasa

Unang Pagbasa: 1 Mc 4:3-37. 52-59
Salmo: 1 Chr 29:10. 11. 11-12. 12
Ebanghelyo: Lk 19:45-48

Memorial
Unang Pagbasa: Zec 2:14-17
Salmo: Lk 1:46-47. 48-49. 50-51. 52-53. 54-55
Ebanghelyo: Mt 12:46-50

Maymay sa Magbalantay

“Si Maria nahimong inahan ni Kristo dili lang tungod kay siya ang nagsabak kaniya. Dili lang tungod kay siya ang nagmatuto niya. Kondili tungod sa usa ka dako ug bililhon kaayo nga rason — si Maria nahimo niya nga inahan tungod kay siya ang numero uno nga nagtuman sa kabubut-on sa Langitnong Amahan.

Si Maria nga maoy unang niingon, “Lord, let it be done to me according to your word.”

Makahagit ni nato labi na karon nga panahon. Abtik kaayo ta moingon, “igsuon ko ni Kristo,” “kapamilya ko sa Diyos,” unya moingon ta sa uban, “my brother in Christ,” “sister.” Ang pangutana lang, tinuod ba gyod nga kapamilya ta ni Jesus? Nagbuhat ba ta sa kabubut-on sa Diyos? Sama ba ta kang Maria? Dili lang sa usa ka higayon kondili kada adlaw sa iyang kinabuhi naningkamot gyod siya nga ang kabubut-on sa Diyos iyang puy-an.

Mao na siyay dakong hagit. Atong ipangutana sa atong kaugalingon. Moingon ta nga igsuon ta ni Kristo, ug moingon sad ta sa uban “mga igsuon ko diha kang Kristo,” atong gipasabot nga kitang tanan nga binunyagan kapamilya ni Jesus. Pero ang dakong pangutana ato bang gipaningkamutan pagpuyo ang kabubut-on sa Diyos diha sa matag adlaw sa atong kinabuhi?

Kon igsuon ta ni Jesus, dili gyod ta magpasakit sa laing tawo. Kon tinuod ta nga igsuon ni Jesus, morespeto gyod ta sa atong isigkatawo bisan og lain sila og opinyon nato, di ta manginsulto, di ta mopasakit og pulong.

Dili gyod ta angay nga manghilabot sa dili ato. Dili ta angay nga mangawkaw, di ta mangawat, mangorap, mangurakot. Ngano man? Igsuon man ta ni Kristo, kapamilya sa Diyos.

Kon tinuod ta nga igsuon ni Kristo, angay gyod ta manggiluloy-on, motabang sa atong isigkaingon ilabi na panahon sa kalisod.

Kon tinuod ta nga igsuon ni Kristo, di ta angay nga mag-marites, manglibak, manaot, magtumo-tumo, mag-gama-gama og estorya.

Kon tinuod ta nga igsuon ni Kristo, dapat dili ta angay nga magbinuang panahon sa piniliay o eleksyon. Di ta angay magbaligya sa atong boto. Mopili ta sa matarong, mosunod sa atong konsensya para sa kaayohan sa tanan.

Mao ni dako kaayo nga hagit tungod kay kita sa Pilipinas mapasigarbuhon raba gyod ta nga usa ka Kristiyano nga nasod. Majority of our people are Christians. Dako ni nga hagit tungod kay ang problema sa graft and corruption taas kaayo diri sa atong nasod. Makapangutana gyod ta sa atong kaugalingon ana.

Hinaot dili ni makapaluya nato kondili mas makadasig nato nga magtarong ta.

Sa tinud-anay lang, ang atong nasod, daghang maayong tawo. Bisan mga bisita moari sa Pilipinas makaingon sila nga ang mga Pilipino matarong, mga buotan, mga mahigalaon, very friendly and hospitable. Ako nagtuo nga it’s because of our Christian faith. Tungod niila man ta og Ginoo, niila man ta nga atong isigkatawo atong igsuon diha ni Kristo, mao na ingon ani ta nga matang sa tawo. And that is really true. Ang problema lang kay dili tanan. Daghan nga mga Pilipino Kristiyanos lang sa ngalan. Mao nay hagit nato.

Kamo nga nagtarong na, atong iampo nga makadasig ta sa uban nga mahimo usab nga tinuod gyod nga Kristohanon ug tinuod nga kapamilya ni Jesus.

Ang atong pagtuo sa Diyos, inubanan sa atong pagtuo sa Birhen Maria nga number one nga sumusunod ni Kristo, hinaot kining pagtuo ma-translate nato into life. Mapuy-an nato sa atong kinabuhi.”