ANG BUNGA NGA GILAOMAN SA GINOO | “Gipasabot sa ato diha sa ebanghelyo nga kining tawo nga tag-iya sa parasan, mao ni hulagway sa Diyos. Unya ang mga kahoy’ng igira, mao kita nga gitanom dinhi sa kalibutan.

Gipasabot ta sa pasensya sa Ginoo dinhi kanato. Siya nga maoy tag-iya sa parasan naay gilaoman para sa matag usa kanato. Naglaom siya og bunga gikan sa iyang tanom.

Bisan kita gani, kon naa tay makita nga kahoy nga wa mamunga, wa magsilbi, ato gyod putlon.

Pero ang hardinero dinhi usa ka hulagway ni Kristo, unya siya gyoy nangaliyupo sa tag-iya, sama nga si Kristo nangaliyupo para kanato sa Diyos Amahan, nga tagaan ta og kahigayonan.

Ang hardinero nga mao si Kristo naningkamot gyod para sa matag usa kanato nga madasig ta ug makapamunga ta og maayo para maghatag og kadayganan sa Diyos Amahan.

Ang pasensya sa Ginoo dunay kinutoban. Walay rasun nga mag-abuso ta sa panahon nga gihatag sa Diyos nato ug sa iyang dakong pasensya. Because even the patience of God has limits. Bisan kita gani kahibaw man gyod ta kon ang usa ka tawo mag-abuso. Dili gyod maayo.

Usa kini ka pagpadayag sa gugma sa Ginoo matag usa kanato. Gidasig gyod ta nga mosanong sa maong gugma ug makapamunga para sa Diyos.

Unsa man ang bunga nga gilauman sa Ginoo para nato? Simple ra kaayo, wala gyod siya mangayo nato nga madato ta. Dili mana maoy kinahanglan sa Diyos gikan nato. Unya mao raba pakadak-an nato, materyal nga kabtangan, bahandi. Dili na maoy gilauman sa Ginoo nato.

Wala pod mangayo ang Ginoo nato og awards, recognitions gikan sa katawhan. Dili mana maoy importante sa Ginoo.

Unsa man diay ang gikinahanglan ug gipangayo sa ato? Bunga ra gyod sa kaayo, gugma, pasensya, pagpasaylo, pagkamasinabtanon, kaluoy para sa uban. Kining maong mga bunga mao ni magpadayag sa iyang gugma para sa kalibutan.

Gilauman gyod ta sa Diyos nga matag usa nato mahimong mahigugmaon, matarong, matinumanon sa iyang kabubut-on, maloloy-on para sa isigkaingon, matinabangon, masaligon. These are the fruits that God is looking from each one of us.”