PAG-AMPO ALANG SA ATONG SINODOHANONG PANAW ADULONG SA 2034
Langitnong Amahan, nagpasalamat kami sa Imong makanunayong paggiya sa katawhan sa Sugbo.
Samtang kami nagpanaw padulong sa jubileo sa among Sentenaryo, bag-oha kami sa pagtuo, paglaum, ug gugma.
Tudloi kami sa pagpaminaw og mayo, pag-ampo nga matinud-anon, paglakaw nga mapaubsanon, ug padayon nga pagkat-on.
Dasiga kami nga magsangyaw nga malipayon, mag-alagad nga madasigon, mag-amuma sa kinaiyahan nga maampingon, magbag-o nga maisugon, ug maghiusa nga mapailubon.
Himoa kami nga Simbahan nga puno sa kinabuhi- usa ka katawhan nga makasabut sa Imong Pulong, magsaulog sa Imong presensya, ug magsaksi sa Imong gugma matag adlaw.
Lig-ona ang among mga pamilya ug mga Gagmay'ng Kristohanong Katilingban. Giyahi ang among mga pangulo nga nangalagad ug dasiga kami sa pag-amping sa usag-usa.
Kining tanan among gipangayo pinaagi ni Kristo, Imong Anak, nga buhi ug hari uban sa Espiritu Santo, Dios, hangtod sa kahangtoran. Amen.
Señor Santo Niño, kaloy-i kami. Maria, Birhen sa Guadalupe, i-ampo mo kami. San Pedro Calungsod, i-ampo mo kami. Amen.
Isip inyong Arsobispo, nagtinguha ako nga ang Artsidiyosesis sa Sugbo mahimong usa ka buhing Simbahan - usa ka katilingban sa mga magtutuo nga dili lang mosugid sa pagtuo, kondili magsaksi niini nga maalamon, malipayon, ug madasigon.
Ang usa ka buhing Simbahan dili masukod sa gidaghanon sa mga motambong sa Misa o sa kadak-on sa atong mga balay-alampoanan. Ang Simbahan mahimong buhi kung ang pagtuo ginakat-on, ginasaulog, ug ginapamatud-an diha sa inadlaw-adlaw nga kinabuhi.
Kining tulo - ang pagkat-on, pagsaulog, ug pagsaksi sa pagtuo - mao ang mga haligi sa usa ka buhi nga Simbahan. Kung anaa kining tanan, ang Simbahan magginhawa uban sa Espiritu. Apan kung adunay usa nga mawala niini, ang Simbahan hinayhinay nga mawad-an sa iyang kainit ug kadasig
