Mga Pagbasa

St. Leo the Great, Pope and Doctor of the Church
Unang Pagbasa: Wis 1:1-7
Salmo: Ps 139:1-3. 4-6. 7-8. 9-10
Ebanghelyo: Lk 17:1-6

Maymay sa Magbalantay

“Gidasig ta sa ebanghelyo nga mag-amping gyod ta sa matag usa labi na sa mga gagmay diha sa katilingban. Unta kita maka-inspire, makatabang, makadasig nila nga magpadayon sa ilang kinabuhi, nga matarong usab nga mga anak sa Diyos, luyo sa ilahang kahimtang.

Hinaot nga ang atong pulong, mga lihok, dili maka-scandalize, di maka-demoralize, ug di sad makadani sa uban nga magbuhat og dautan.

Alaot ang mga tawo nga maoy makaingon sa laing tawo nga makasala hilabi na sa mga gagmay diha sa katilingban.

Ato ning ipatuhop sa atong hunahuna ug kasingkasing nga maglikay kita nga mahimong hinungdan nga ang laing tawo makasala. Sa atong pulong, sa atong kinaiya, sa atong batasan, mag-amping gyod ta.

Diha sa panimalay magsugod, mga ginikanan, mga kuya ug ate, be careful with the way you live your life. Di unta mo makadaot diha sa mga gagmay sa inyong panimalay.

Mga ginikanan, likayi ninyo mahimong dautang ehemplo sa inyong mga anak. Ayaw mo pagbisyo, ayaw mo panugal, ayaw mo paghubog-hubog. Ang inyong pagpamalikas, mga dautang pulong. Ampingi gyod inyong mga anak. Be careful because you have an important role in your family. Kamo ang gitahasan sa Ginoo nga mahimong inspirasyon sa inyong kabataan. Kon masuko man gani, ampingi inyong mga pulong nga dili dautan.

Sa mga magtutudlo diha sa eskwelahan, be good role models to your students. Ampingi na inyong mga linihukan ug binuhatan, labaw sa inyong mga pulong diha sa tunghaan. Hinaot makadasig mo, maka-inspire mo sa inyong mga bata.

Importante sab kini sa mga pari, mga kaobispohan, mga relihiyoso diha sa simbahan. Kita gyod ani ang labing unang maigo kon maghatag ta og dautang ehemplo sa atong mga parokyano. Mga kaparian, kamadrehan, kaobispohan, mag-amping gyod ta sa atong mga pulong, ug labaw sa tanan sa atong kinabuhi, nga makadasig ta, maka-inspire ta sa atong katawhan. Hinaot tungod nato ang mga tawo mas maduol sa Diyos.

Kon dunay atong mga kaigsuonan nga magbuhat og dili angay, atong pahimangnoan. Badlunga siya. Dili nato pasagdan. Dili mahimo nga atong kauban diha sa panimalay, sa opisina, mga kasilinganan, ato lang pasagdan nga magbuhat og dili maayo. We must be responsible to each other. Kinahanglan ta mag-amping ug magbantay sa usag usa. Pahimangnoan gyod nato sa paagi nga maayo usab. Dili pagpanginsulto. Dili magpakaulaw.”