Mga Pagbasa

31st Week, Ordinary Time; or memorial of the Blessed Virgin Mary on Saturday
Unang Pagbasa: Rom 16:3-9. 16. 22-27
Salmo: Ps 145:2-3. 4-5.10-11
Ebanghelyo: Lk 16:9-15

Maymay sa Magbalantay

“Ang atong paggamit sa atong bahandi karon ato siguroon nga makapalangit nato. We use money out of love and then this money will be our investment in heaven. Ang kwarta nga atong gigamit uban ang gugma para sa isigkatawo, mahimo ni siyang ticket nato didto sa langit.

Hinaot nga kining gipiyal nga bahandi sa Ginoo nato, dili man gyod ni ato. Hinaot unta nga kasaligan ta sa Diyos nga nagpiyal nato. Ingon siya, kon di ka masaligan sa gagmay nga butang, unsaon man pagsalig sa Ginoo nimo sa dagkong butang?

Kining bahandi nato dinhi sa kalibutan bisag unsa ni kadako, gamay ra gyod kini kaayo nga butang nga gipiyal sa Ginoo nato. Kon mapiyalan ta ani, mapiyalan pod ta niya sa dagkong butang nga tua na sa langit.

Walay tawo nga mahimong ulipon sa duha ka agalon. You cannot serve both God and money. Di ka makasilbi or makahatag og serbisyo sa Diyos ug sa bahandi at the same time. Mopili ra gyod ka, kinsa may imong alagaran, ang Diyos o ang salapi?

Wala ni magpasabot nga ang bahandi o salapi dautan. Ato man gani silang isipon nga grasya. Magamit man nato ang kwarta sa pagbuhat og maayo. Magamit nato ang bahandi sa pagserbisyo sa Ginoo.

Ang gugma sa bahandi maoy dili maayo. Kana bang murag ang imong kasingkasing ibutang na gyod nimo diha sa salapi.

Dunay mga tawo nga mura na gyod og ulipon kay ang tanan niyang hunahuna ug kusog, tanan niyang panahon, pagbati, para ra man gyod sa panapi. Gusto madato og maayo. Gusto magsige og dugang sa bahandi nga gihuptan.

Kanang mahutdan ta og panahon sa pamilya kay magnegosyo lang ta pirmi, mahutdan ta og panahon sa Ginoo kay puro ra ta trabaho, ulipon na gyod ta ana sa bahandi. Di maayo. Gatuo ta og malipay ang Ginoo ana? Di gyod malipay ang Ginoo ana.

Kinahanglan atong gugma, atong kasingkasing, para ra gyod sa Ginoo. Ang kwarta himuon na natong tool para sa pagpadayag nato sa gugma sa Ginoo ug sa paghigugma nato sa atong isigkatawo.”