“Resurrexit sicut dixit” – Nabanhaw siya sama sa iyang giingon…
Mao kini ang lanog nga mensahe alang kanato niining Pagkabanhaw sa atong Ginoo. Nadawat nato ang kaluwasan, ang gasa sa bag-ong kinabuhi, kay Nabanhaw siya sama sa iyang giingon.
Sayud kita nga ang tibuok kalibutan anaa sa malisod nga kahimtang karon. Adunay gubat nga nagdala og hilabihang kalisod dili lamang sa mga hingtungdan nga nasud apan lakip na sa ubang kanasuran. Nagpadayon usab ang mga politikanhon ug ekonomikanhon nga krisis sa daghang mga kanasuran.
Makita nato nga anaa kita sa gutlo sa kasaysayan sa kalibutan nga kitang tanan mibati sa epekto sa sayop nga mga desisyon, sa kakuwang sa pagpakabana, ug sa mga dautang interes nga nagpahimulos sa kaugalingon lamang ug dili sa kaayohan sa kadaghanan.
Niining Pasko sa Pagkabanhaw, sugaton unta nato ang Nabanhaw nga Ginoo uban ang bag-ong paglaum. Kon ang iyang pagkabanhaw naghatag kanato og bag-ong kinabuhi, kining misteryo nagtanyag usab og bag-ong panglantaw mahitungod sa kasamtangang mga panghitabo karon. Ang kaluwasan nga dala niining pagkabanhaw dili lamang alang sa tawo; alang usab kini sa tibuok kalibutan kay siya mianhi man dili lamang isip Manluluwas sa tawo, apan Manluluwas usab sa tibook uniberso.
Sa atong Pagdawat sa Nabanhawng Kristo ug sa iyang makaluwas nga grasya, ato unta lig-onon ang atong pagtuo ug paglaum sa iyang saad sumala sa gisaysay ni San Juan sa Basahon sa Gipadayag:
“Karon ang puloy-anan sa Dios ania na sa katawhan. Magpuyo na siya tipon kanila ug sila mahimong iyang katawhan. Ang Dios makig-uban kanila ug siya mahimong ilang Dios. Pahiran niya ang luha ug wala nay kamatayon o kasubo, paghilak o kasakit kay nahuman na man ang daang mga butang… Gibag-o ko na ang tanang butang. ” (Gipadayag 21, 3-5).
Malipayong pagsaulog sa Pasko sa Pagkabanhaw sa atong Ginoo.
Ang iyang Pagkabanhaw magbag-o unta kanato ug sa tibuok kalibutan!
Diha ni Kristo,
+ ALBERTO S. UY, D.D.
Archbishop of Cebu