“Karong Domingoha mao ang dakong piyesta o solemnidad sa Labing Balaang Dios, ang Santissima Trinidad — usa ka Dios nga adunay tulo ka Persona: Amahan, Anak, ug Espiritu Santo.

Ang Balaang Trinidad nagpadayag nato nga diha sa kasingkasing sa Dios anaa ang nindot nga relasyon ug kahiusahan, dili ang panagbulag o pagkanya-kanya. Ang Dios mao ang hingpit nga hulagay sa panaghiggugmaay.

Sa Ebanghelyo karon si Jesus miingon: “Kay gihigugma pag-ayo sa Dios ang kalibutan Iyang gihatag ang iyang bugtong Anak” (For God so loved the world, that he gave his only begotten Son) -John 3:16.

Notice this: ang Amahan maoy naghatag, ang Anak maoy gihatag, ug ang Espiritu Santo mao ang gugma nga naghiusa kanila.

Ang Balaang Trinidad usa ka Dios nga mo-reach out, maoy maningkamot nga maduol kanato, magsakripisyo tungod ug alang kanato, ug magpabiling usa diha sa gugma.

Ug tingali mao kini ang mensahe nga gikinahanglan pag-ayo kanatong mga Pilipino karong panahona.

Nag-atubang kita og grabe nga pagkabahinbahin sa politika.

Daghan kanato naapeke sa panudlanan ug panginabuhian, tungod sa pagsaka sa presyo sa mga palaliton.

Nagkalayo ang gap o panagbulag sa mga adunahan ug mga kabos.

Dugang pa sa problema sa pagkabahinbahin mao ang nagkadaghan nga mga fakenews ug bakak nga impormasyon diha sa social media.

Kining mga fake news ug disinformation nagdasig sa mga tawo nga masuko ug mawad-ag pagsalig sa usag usa.

Daghan kanato karon ang dali ra kaayong mag-away ug magkabikil, magkabahinbahin— bisan diha sa mga pamilya, sa mga higala, ug kasilinganan.

Ang kada usa naghunahuna nga maoy sakto, unya gusto nga siya ang tuohan, ug maoy paminawon. Unya og dunay tawo o pundok nga lain og opinyon o hunahuna, masuko ug di na makig-uban.

Ang Balaang Trinidad nagpahinumdom nato nga ang kahiusahan wala man magpasabot nga kinahanglan parehas tanan og hunahuna o kagustohan. Ang Amahan dili Anak. Ang Anak dili Espiritu Santo. Apan nagpabilin silang hingpit nga usa diha sa gugma.

Sa samang paagi, bisan managlahi kita og opinyon, baruganan sa politika, o kahimtang sa kinabuhi, dili unta mawala ang atong respeto ug gugma sa usag-usa isip usa ka katawhan ug usa ka nasod.

Unta magpaminaway kita, ug magpabiling abli sa giya sa Espiritu sa Dios, ug andam maminaw sa uban, andam makorehi-an aron nga makahupot sa kamatuoran.

Dili molungtad ang usa ka nasod kon ang mga tawo maantigo lamang mosaway, magbasulay, ug magdinaotay. Ang kaayohan magsugod kung ang mga tawo makakat-on pag-usab sa pagpaminaw, pagtahod, pagpasaylo, pagtinabangay, ug pagsakripisyo alang sa kaayohan sa tanan.

Ang Balaang Trinidad nagtudlo nato nga ang tinuod nga kusog dili makita sa pagkabahinbahin kondili sa panaghiusa.

Hinaut nga kining maong kapistahan maghagit sa matag Pilipino:

Imbis nga pagdumot ang ipakaylap, magpatigbabaw kita og pagsinabtanay.

Imbis nga dugangan ang pagkabahinbahin, magtukod kita og mga taytayan alang sa kahiusahan.

Imbis nga kaugalingon lamang ang hunahunaon, magkat-on kita sa pag-atiman sa usag usa.

Kay ang usa ka nasod mahimong lig-on kung ang katawhan mopili sa panaghiusa nga nakagamot sa kamatuoran ug gugma, diha sa Dios.”