“Kinsa man ang mga karnero nga walay magbalantay sa atong panahon? Sila mao ang mga kabatan-onan nga nagdako sa kalibutan nga puno sa impormasyon apan kulang sa kaalam.
Sila ang mga tawo nga sige og tan-aw sa social media apan nag-anam og kalayo sa isigkatawo ug walay makahuluganon nga relasyon.
Sila mao ang mga ginikanan nga naglisod sa pagpangita og paagi aron masuportaan ang ilang mga pamilya.
Sila ang mga tawo nga nangita og kalipay sa kwarta, gahum, ug pasidungog apan sa kaulhian naka-realize nga wala silay kalinaw sa kasingkasing.
Sila ang mga tawo nga wala na masayod kinsa ilang tuohan o saligan tungod sa mga korapsyon, manipulasyon, ug pagkabahin-bahin sa katilingban.
Daghang tawo karon ang mawala ug mahisalaag. Dili tungod kay wala silay GPS. Nawala sila sa saktong dalan tungod kay wala silay moral ug espirituhanong giya. Ug si Jesus nga nagsud-ong kanila karon, naluoy pag-ayo kanila.
Apan mga igsuon, angay ni natong masabtan, wala baya moingon si Jesus nga ang problema mao ang mga karnero. Ang iyang giingon mao nga daghan ang anihon, apan diyutay ra ang mangangani.
Busa, ang problema diay dili sa kadaghan sa nanginahanglan og tabang. Ang mas dakong problema mao ang kakulang sa andam motabang ug mogiya sa mga tawo padulong ngadto sa Diyos.
Kinsa man ang mga mamuo nga angay moani karon? Of course, mag-una niini ang mga pari, madre, relihiyoso, misyonero. Mao nga kinahanglan kita mag-ampo alang sa dugang pa nga bokasyon.
Apan mga igsuon, ang mamuo ug mangangani mao usab ang ginikanan nga nagtudlo sa ilang anak sa pag-ampo. Kulang na baya ni karon.
Ang mga magtutudlo nga naghulma dili lang sa utok apan sa kasingkasing usab sa ilang mga estudyante. Nihit nani sila karon.
Ang mga apohan nga nagpadayon sa pagpasiga sa kalayo sa pagtuo sulod sa ilang pamilya. Duna pa ba?
Ang mga matinud-anong opisyal sa gobyerno, ang mga responsableng negosyante, ang mga katekista, ang mga leaders, ang kabatan-onan, ug tanang tawo nga nagdala og kamatuoran, kaayo, ug paglaum ngadto sa uban, nag-anam na kagamay.
Sa laing pagkasulti mga igsuon, ang matag binunyagan, gitawag sa Ginoo nga mahimong mamuo o mangangani sa iyang uma.”